اول اشي اكبر تحية لكل من زار مدونتي وان شاء الله تكون عجبتكم .. الله وكيلكم اتعبت فيها وفي الموقع يعني لازم تعجبكم مو بخاطركم لا غصب عنكم

المهم ندخل بموضوعنا
اليوم موضوعنا عن اغاني الايام هادي
زي ما منلاحظ كلنا انو كل يوم بطلع اغاني لا تعد ولا تحصى وكل يوم بطلع فيديو كليبات ( اخ يا ويلي منها ) برضو لا تعد ولا تحصى ..غير المغنيين الجداد الي حرام نحكي عنهم مغنيين او مطربين
وكتير احيان نجحت ولاقت شهرة بعض الاغاني السخيفة البايخة هادي الي كلماتها بتقزز وملهاش معنى فاكتشفت انه السر في نجاح هادي الاغاني هو سخافتها ... يعني الاغنية الاكثر سخافة وسذاجة بتلاقي نجاح اكبر سواء بالكلمات او الفيديو كليب او غيره
لا والمشكلة انو الاغاني الطرب بطلت تنفع هالأيام هاي والموضة صارت للاغاني البايخة بس ..ولسة ياما هنشوف
وانا برأيي انو اسخف اغنية حسيتها بايخة وقليلة ادب ولاقت شهرة هي اغنية انا دانا يعني لقيت كتير برددوها وكمان اغنية عتريس لدومنيك ورجب لهيفا وغيرها كتير ... يعني والله ما عارف شو الحلو فيهم هالاغاني ... انت شوف هالكلمات ولا هالفيديو كليبات .. والله اشي بخزي ...وفي اغنية الحقيقة حسيتها مخزية فعلاً وهي اغنية البرتقالة .. والبتنجانة..والتفاحة .. ومش عارف شو ...رقص بخزي وفيديو كليب  مقرف .....الله يرحمك يا عبد الحليم..الله يرحمك

انا الحقيقة مش عارف شو اكتب كمان خاصة اني اول مرة تقريباً بكتب يعني جديد على المدونات فأرجو انه تكون الفكرة وصلتكم ..
 
وانت شو الاغنية الاسخف الي شفتها بحياتك وكانت معروفة او مشهورة او حتى لو مش مشهورة اكتبها بالتعليق

وتحياتي لكم